هو موبايلك بكاميرا طب بتصور اية ؟؟؟؟؟؟؟؟

     

     كل واحد حر فى موبايلة يحط علية رنات ونغمات اللى تعجبة ماشى لكن ماسك الموبيل يصور فى البنات والستات اللى موجودين عيب وعيب قوى اللى بيحصل دة كل واحد فرحان بالكاميرا اللى فى ايدة وهات يا تصوير وبيصور فى احد عارفة والا مش عارفة مش عارفة اللى بيكون راكب اتوبيس والا ميكروباص والا بيجو ونازل تصوير فى البنات والستات اللى قاعدين وانا بحدد علشان ماحدش يقولى بيصور الزحمة اللى جواهم لأن بقى موقف بيتكرر يومياً وبيحصل مع ناس كتير تخيل انك تكون راكب عربية والا بيك والا عليك ومسافر من مكان لمكان وتكتشف ان فى حد بيرصد كل حركاتك حركة حركة من اول ما تقعد فى العربية لحد ما تنزل ملف كامل من الصور ليك مع واحد ما تعرفوش طب هتعمل اية ؟؟؟؟؟؟؟؟

هتتخانق مع اللى بيصورك وتمسح الصور اللى على الموبيل ؟

طب لو ما اكتشفتش الصور هيكون موقفك اية وانت بتقرا الموضوع وممكن تكون صورك على موبيل حد ما تعرفوش

طب الصور دى بيتعمل بيها اية؟

رشا خطاب

حاجة ببلاش كدة

ماتدخلش البيت وايدك فاضية
ماتدخلش على حماتك وايدك فاضية
عايز تهدى خطيبتك هدية حلوة
عايز تدلع ولادك بهدية نادرة

نحقق لك الحلم مقابل مبلغ رمزى
50 الف دولار
نعم 50 الف دولار فقط
ب 50 الف دولار فقط هدية نادرة
اخرقطة

القطة نيكى الصغيرة
اخر عنقود القطط المستنسخة بعد ان قررت شركة التكنولوجيا الحيوية الأمريكية

 التى تخصصت فى استنساخ الحيوانات الأليفة غلق ابوابها نهائيا

الشركة حددت سعر نهائى غير قابل للفصال

 

بادر واحجز اخر نسخة

حاجة ببلاش كدة

رشا خطاب 2007

برغوتة تغير اسمها إلى ........

اقدم لكم احدث صيحات الموضة

بعد ان اصبح الخلع دى مودية

مش موضة

راحت عليك يامعلم

الموضة اليومين دول تغيير الاسامى

كل واحد يغير اسمة

برغوتة بتدور على اسم جديد

عايزين تعرفوا لية

ما انا طول عمرى راضية باسمى

قلت اطقس واشوف الستات والرجالة بيغيروا فى اساميهم لية

اية الحكايا

ومطلوش عليكوا

لأ قولوا طولى

اتارى عفركوش بن برتوش هو السبب

طلع عليهم فى قناة فضائية

قالهم ان اساميهم "حار" على صاحبه

يعنى ما بيجبش الحظ

وكمان علشان الواد حنتوش النصاب يختار الاسم

اللى بيجلب الحظ بياخد 100 دولار

علشان يختار الاسم

ويكلموة فى البرنامج

يا حليلة يا حليلة

وقال اية مش عاجبة ايمان وفاتن ونسرين ولمياء

وعجبة اسم حنتوش

وكمان طالع يقول

وأن اسم الأم والابنة ما يتطابقش مع حسن الحظ

صحيح حنتوش مبخت

طلعوة فى قناة فضائيية

وعاملين لة برنامج يومى

ويقولوا العالم الخبير الفلكى

ماحدش معاة جوز جذم قديمة

اخبط التلفزيون يمكن يتعدل

قال اغير برغوتة قال

رشا خطاب

هاتتخلع يا معلم (4)

هتتخلع يامعلم

 يعنى هاتتخلع يامعلم

بالذوق بالعافية

 بالشاكوش والا بالكماشة

هتتخلع هتتخلع

عايز تعرف هاتتخلع لية

مزاجى وانا حرة فية

حد عندة مانع

مش عارف هاتتخلع لية

انا عارفة انك بتتكلم انجليزى لبلب

وممكن تكلمنى انجليزى انا والعيلة والصحاب

وتعملى عيد ميلاد تكلم فية صاحبى بالانجليزى

ما انت غاوى منظرة

بس قديمة

بقت دى مودية

راحت عليها

طيب هاتتخلع لية كل دة ومش عارف

صحيح احنا كتبنا الكتاب ولسة الفرح ماتمش

مش مشكلة

وصحيح ان العفش لسة فى بيتنا ماوديتهوش الشقة

ومش هاودية

اصلك يا جميل هتتخلع علشان الشقة سمعنى بتقول اية ما سمعتش على صوتك كمان كمان شوية اية مالها الشقة دى مالها ومالها ومالها واتقلب حالها انا اتجوز فى الشقة دى دى بيئة .................................... ( كلمة روشة طحن ) تعنى مش قد المقام الوانها مش ستايل الوان من المتحف وكمان العفش مش سينية وذوقة بلدى جداااااااااااااااااااااا حد يا راجل يجيب انترية لونة فوشيا لعروسة

وتقولى دى احدث موضة كنت جبت كنبتين اسيوطى وكمان متاخدش راى فى العفش مش دة المفروض عفشىوكمان مش عايز تغير العفش وبتشترى على ذوقك انت اذا كنت بتعمل كدة قبل ما الجوازة تتم بكرة هتعمل اية ياغدار ................. تنفع اغنية لهيفا روح وانت مخلوعمخلوع ولا انت على بالى وانت اكيد دارى انك اكيد مخلوع تنفع لتامر حسنى كان هذا هو نص المكالمة الاخيرة بين العروسة وزوجها المخلوع نلتقى بعد الخلع

رشا خطاب 

 7 مارس 2007

قناة برغوتة الفضائية

ازف اليكم هذا الخبر الهام

ايوة هام

انطلاقا من الانفتاح على السماوات المفتوحة

والعالم قرية صغيرة

وفى عصر الفضائيات المفتوحة

تطل عليكم قناة برغوتة الفضائية

اشمعنى انا

ما هو كل واحد عندة قرشين

بيعمل قناة فضائية

ومتسالوش هاذيع اية

حسب الموضة هاعمل

ماهى فى الغالب

هتكون انضمام لحنفية قنوات الاغانى المفتوحة

اصل مكسبها كتير

واعمل شوية برامج

اعمل فيها برنامج مسابقات

وجوايزة فلوس كتيير متعدش

1000000جنية والا دولار والا ريال

يعنى حد هاياخدهم

ابقى قابلنى

واعمل سؤال يدوخ الناس

هو عين الحرباية لونها اية

والناس تتصل تسجل اساميها وبعدين 

ابقى اطلب كام نمرة منهم على الهوا

والا هايعرف يجاوب اقطع علية الخط

واقول زى ما بيقولوا للاسف الخط اتقطع ياريت تكلمنا تانى

واعمل خط للشات

دى مضمون مكاسبة

شوية رسايل تجنن انا حلموس ممكن نتعرف

والا الاجمد وقنبلة القناة

تعال نتعرف على التوافق

يعنى كل اتنين يبعتوا اساميهم واحنا هنقولهم اذا كانوا مناسبين للبعض

يعنى يكملوا والا يفضوها سيرة ويفركشوا الجوازة

واعمل برنامج اجيب فية كام عراف

بيقروا الفنجان وابى ازين اباى اوشوش الودع

ومتقولويش يقروها ازاى هتحط الفنجان فى السماعة وهو هيقراها

واجيب خبير فلكى يعمل برنامج

يقولى انت تراب والا مية

وبرج التور مع الميزان

واجيب كمان مشعوذ يعمل اعمال

على الهوا ويقولك مين عاملك عمل

ومشبشبلك

ويوقع العيلات فى بعض

والاصحاب فى بعض

علشان يكسب والقناة تكسب

واعمل تصويت كمان بين الدول

مين الافضل

وكل واحد يدخل يصوت

وهاعمل برنامج كمان للاصوات الوحشة

تجديد اى واحد

عايز تحفنا ويغنى يجى ويغنى

بس يدفع الاول

ومحدش يسألنى هاتجيبى التمويل لكل البرامج دى منين

البركة فى ماما امريكا 

ربنا يخليها للغلابة

هتساعدنى

والقناة هتلاقوها على

على القمر : اللى ما يتسماش

التردد : 000000

معدل الترميز : اونطة / بكش

معامل التصحيح : مالوش لزوووووووووم

الاستقطاب : على كل لون يا باتستة

وعلى فكرة مطلوب مذيعين بنصف لسان

ومعدين خبرة فى اعداد البرامج الهايفة باجور مغرية

رشا خطاب

هتتخلع يا معلم (2 )

يوم بعد يوم بتجينا موضات اشكال والوان

تبقى جديدة وبعد ساعات تبقى دى مودية

والموضة اللى ماشية اليومين دول هى الخلع

وبالذوق بالعافية هتتخلع يا معلم

واحدث صيحة فى عالم الخلع

العروسة شابة صغيرة عندها 100 سنة

والعريس شاب يا ولداة

اكبر منها مش بكتير بخمس سنين بس 105 سنة

والمشكلة بينهم مش سببها فرق السن

علشان ماتقولوش ان فرق السن دا هو اللى عامل المشكلة

المشكلة اللى طلبت على اساسها العروشة قصدى العروسة الخلع

ان جوزها عينة زايغة بعد شوية سنين صغننة

تعدوا اليوبيل الماسى من الجواز

جوزها كل يوم تلاقية بيكلم البنات الصغننين

ويهزر معاهم

قالت لة اكتر من مرة مايتكلمش مع اى واحدة ست برة البيت لانها بتغير علية

وهو ما سمعش الكلام غلطانة الست

والا عداها العيب

راحت رفعت دعوة الخلع علية

الاولاد والاحفاد واولاد الاحفاد يحاولوا

يا جدو يا تيتة

مفيش فايدة

رشا خطاب

هتتخلع يا معلم (1 )

اذا كنت لاتتحدث اللغة الانجليزية بطلاقة

احجز مقعدك بين المخلوعين

من فضلك ماتبحلقش كتيير للخبر

عادى يعنى

فيها ايه يعنى هاتيجى على الجواز وتقف

ماهو مطلوب منك انك ترطن بالانجليزى على أي حاجة هاتيجى عند الجواز وتقف

مش مصدقنى

طب اسمع

لالالالالالالا مش هاغنى


اصبر بس


وركز معايا

واقرا معايا بتركيز

وشوف المعلم اتخلع ازاى


اصل الحكاية بدأت بالانجليزى وزى ما انتوا عارفين ان اللى يبتدى بحاجة ينتهى بيها

اصل المعلم كان فى مؤتمر وكان عمال يتكلم بالانجليزى هى شافتة من هنا وسخسخت وداخت هو دة فتى احلامها اللى هايخدها على بى ام البيضا

اصل الحصان الابيض راحت علية بقى دى مودية

وهو شافها من هنا قال هى دى فتاة احلامه واتفقوا على كل حاجة وتم الجواز طب اية اللى حصل

صحى من النوم بعد شهرين

لقى دعوى خلع

ازاى حصل دول لسة متجوزين وما كملوش شهرين

ولسة جايين من شهر العسل طب لية الخلع

اصل الزوجة الغلبانة ياعينى عليها سئمت من الحياة الزوجية

بعد اقل من شهرين

لأن المتوحش مش بيعاملها بخشونة والا بخيل لا سمح الله على العكس مش حارمها من حاجة


الكارثة والمصيبة اللى زلزلت حياتهم

انة بيكلمها بالعربى ومصر انة يكلمها بالعربى طوووووووول الوقت

والغلبانة مستحملة كلماتة العربى وقلبها بيتقطع وودانها مش قادرة تستحمل الكلمات العربى

والغلبانة فضلت مستحملة شهرين بحالهم وصابرة بتحاول تقنعة يغير العادة السيئة دى ويكلمها بالانجليزى

مفيش فايدة

المشكلة تفجرت فى عيد ميلادها وسط اصحابها

فى عيد ميلادها اللى ماتقلش كام عملها حفلة كبيرة فى فندق كبير وعزم كل اصحابهم وحب يجامل ضيوفة ويتكلم معاهم

تعرفوا عمل اية وقال ايه

رحب بيهم بالعربى يا اهلا وسهلا ازيكوا عاملين اية شرفتونا .......................................الخ

وشوية كلام بالعربى ما انتوا عارفينة وبتقولوة على طول

اعتبرتة المدام اهانة كبيرة وفضيحة فى وسط اصحابها . اخدت هدومها وعلى بيت دادى على طول ومن المورننج رفعت قضية خلع

قضت محكمة الأسرة ب...... بخلع زوجة مترجمة خريجة الجامعة الأمريكية من زوجها الطبيب لأنه لا يتحدث معها باللغة الإنجليزية داخل شقة الزوجية‏,‏ ورفضت الزوجة كل محاولات الصلح‏.‏

عروستنا ردت كل حاجة بعد شهرين عشان كلامة مش عجبها بيتكلم عربى لية سبب وجيه للخلع هو احنا عايشين فين ولا قمنا وصحينا لقيناهم غيروا لغتنا واحنا مش عارفين


بس للاسف الخبر مقالش المهر كان كام واترمى على جذمة ماركة اية 

 

رشا خطاب

قمة عادية طارئة ……….لظروف عادية طارئة

     بالرغم من دورية القمة العربية  الا انها تعقد فى وقت شديد الحساسية . فانعقاد القمة فى بيروت بدلاً من الامارات بعد تنازل الامارات . وانعقادها فى ظل تهديدات شارون للرئيس عرفات التى لاحدودلها وغطرسة شارون ورغبتة فى حضور القمة واستمرار الانتفاضة الفلسطينية  واستمرار العدوان الاسرائيلى وصراع البيت الداخلى فى لبنان بسبب تكليف وزير الثقافة اللبنانى بالإعداد  للقمة العربية بدلاً من وزير الاعلام المسئول عنها بحجة اعدادة للقمة الفرانكفونية التى كان من المقرر انعقادها فى لبنان وعدم مشاركة رئيس الوزراء اللبنانى رفيق الحريرى ورئيس مجلس النواب نبية برى فى استقبال الوفود مع الرئيس اللبنانى اميل لحود وعدم مشاركتهم فى اللقاءات الثنائية بين رؤساء الوفود واحتجاج الصحفيين والاعلاميين على التعتيم الاعلامى الذى يصاحب القمة وعدم قدرتهم على الحصول على أى معلومات عن القمة وعدم تمكينهم من اجراء اللقاءات بجانب الاجراءات الامنية المشددة . واحتجاج وتجمهر نخبة من الاعلاميين والصحفيين امام مقر قناة الجزيرة فى بيروت المخصص لتغطي القمة العربية لرغبة القناة فى اجراء حوار مع شارون قبل انعقاد القمة بساعات والتى لم تنتة الا الغاء اجراء الحوار بسبب الاجراءات التى فرضتها السلطة الاسرائيلية على طاقم قناة الجزيرة .وتغيب عدد كبير من الزعماء العرب عن الحضور للقمة العربية منهم الرئيس المصرى حسنى مبارك والمللك الاردنى عبدالله بن الحسين والزعيم الليبى معمر القذافى وعدد من الزعماء والقادة وتغيب الرئيس ياسرعرفات عن حضور القمة بعد عدم السماح له بالمغادرة ومع انعقاد القمة تم حجب كلمة الرئيس عرفات والتى كان مقرر نقلها وانسحاب الوفد الفلسطينى من القمة ونقل قناة الجزيرة لكلمة الرئيس عرفات وحضور كوفى عنان وخافيير سولانا كمراقب ،اشاعة انسحاب الوفد السعودى بعد اصابة رئيس المخابرات نواف عبد العزيز بوعكة صحية ونقلة إلى مسنشفى الجامعة الامريكية

وتخفيض مستوى الوفد الاماراتى بعد سفر نائب رئيس دولة الامارات

. ماذا بعد ؟

هل مع كل هذه التحديات ستنجح القمة العربية على مستوى رؤسها لتنجح جماهيرياً فى استمالة الرأى العام لها ؟

ماذا ينتظر من هذه القمة ؟ هل ستصدر قرارات تستطيع تنفيذها

هل تستطيع لم الشمل العربى ام التضامن العربى ام شتكون مجردد خطب رنانة

رشا خطاب 

28/3/2002  

قرب قرب قرب

بص شوف ...
حقق دقق....
وقرب قرب قرب
دنيا جديدة وعالم اعجب الفرجة ببلاش يا بلاش
فى مكان غير المكان لكن هو المكان
وزمان غير الزمان لكن هو الزمان

وحكاية هى الحكاية لكن غير الحكاية
وتعالى قرب يا صاحبى واتفرج معايا
اتنين اتنين ماهى الجامعة اتنين اتنين
اتنين احبة بيتلاقوا جو ه الجامعة
واللى هنا اتنين بيتعاتبوا جوة الجامعة
حاجة عادية وامر طبيعى
لكن الغريب والعجيب اللى بيحصل من زمان ولسة لحد الأن

نفس المكان اللى كان بيستقبل عشر طلاب بيستقبل عشر طلاب فوق الالف وزيادة
ازاى ماعرفش ومتسألنيش اتفرج وانت ساكت لحسن يقولوا عليك ....!؟
وفرق كبير بين عشر ة زمان وعشرة النهاردة
عشرة من العشرة الكتار جايين ياخدوا علم
وعشرة غاويين علم وعشرة بيدعوا علم
وعشرة فهموا الدنيا وجايين بيبعوا علم
وعشرة كمان جايين بصجات
وما تستغربش وما تستعجبش
دوول فهموا الدنيا ماشية ازاى
كان زمان بيقولوا ان فاتك الميرى اتمرمغ فى ترابة
والوقتى بيقولوا ان فاتك الرقص اتشعلق فى حبالة
وان ماكنتش مصدق شوف الفرق بين جامعى ورقاصة درجة عاشرة
اللى تقضبة فى يوم يجمعة هو فى عشرة بعد المليون وان قدر ياصاحبى
شوفت الجامعة فرق كبير بين زمان والان
مواضيع كتير جدت على الجامعة عرفناها ومش محتاجة تفتيح
تسمعها من أ ، س ، م ، ع ،و، ن ، ا
ومتسألنيش دول مين لانهم فى الجامعة رايحين جايين
والله اعلم دول مين وحكايتهم ايه
لو عايز تسمع كمان استنى فى نفس الميعاد
تسمع حكاية والا اتنين ابطالها معروفين
وبتكتبها واحدة مش عارفة هى مين

الصديق الوفى

أبحث عنة أين أجدة ...هنا أم هنا ... أم هناك

هل رأيتموة ؟ هل سمعتموة ؟

أسفة لاأحد يستطيع أن يسمعة غيرى ولكن تسطتيعون أن تروة

هل بحث عنى كما بحثت عنة ؟

هل يفكر فى كما افكر فية ؟

ابحث عنة كثيرا .. اخيرا وجدتة امامى وأبحث عنة

الآن سأقص علية حديثى

سينصت لى ولكل حديثى فأنا واثقة

صديقى أسمعنى سأقص عليك وأعترف لك بمشاعرى

فمهما أحاول أن أقول لن أفيك جميلا

حينما أكون معك أشعر بأمان

أحكى وأقص بهمومى وأشجانى

اطرح احزانى والامى

احكى وابوح باسرارى

استرسل معك فى حديثى لا أخجل منك ولا تخجل منى

وأنت دائما ً تحثنى على ذلك

احس بك دائماً تسمعنى تفهمنى تشعر بى

لاأشعر معك بالوقت أمضى معك طوال الوقت

لم تغدر بى كنت دائماً صديقى الوفى

دائماً تساعدنى فى الكتابة

تجعلنى أكتب أكتب

فأنت تعرف حبى للكتابة وتساعدنى على حبها

دائما تذكرنى أعرف أنى كثيرة النسيان

أطلب منها أن تسامحنى فهى تجيب طلبك

أعرف أنها رفيقة دربك نعم أعتذر لها

فهى لاتنسانى وانا لن أنساها

اشكركما فقد شاركتمونى منذ الصغر

منذ مهدى فى الكتابة الف باء تاء ثاء

أكتب اكتب أكتب أكتب

تقول لى أنك سعيد وأنت تساعدنى فى الكتابة

لأنى أكتب عنك لأول مرة فى حياتى

وعن رفيقة دربك لا ولن أنساها هذه المرة

قلمى العزيز أوراقى الحبيبة

هذه ليست رسالة شكر وأنما عرفان بجميل فأنا لاأستطيع أن أستغنى عنكما

وهل يستطيع أحد أن يستغنى عنكما ؟

رشا خطاب

24/5/1998