اياد واروى

امبارح قررت ان انزل انا وصحابى نتفسح و نلف على المحلات شوية اصلى عقبال عندكوا باجهز وبنزل كل يوم علشان اكمل اللى ناقص فى الشقة وكالعادة خلصت الفلوس قبل ما اخلص شرا وبما انى كنت قريبة من عيادة اخويا والاخوات لبعضيهم قلت اطب علية فى العيادة و اخد منة فلوس واكمل شرا طلعت وخير الله ما اجعلة خير العيادة لقيتها مالينة على الاخر ما شاء الله علشان مايقولش عليا باحسدة والا حاجة ويطنش على الفلوس ويقلبنى قلت خلاص شكلة قابض النهاردة و مية مية ومش هيأخر على اختة حبيبتة حاجة دخلت والممرضة كانت مشغولة مع الزبانين وما اخدتش بالها منى قلت اقعد استنى لما يخلص الكشف اللى عندة واخد الفلوس وامشى المهم قعدت مع الناس اللى قاعدين وابص حواليا اللاقى خير اللهم ما اجعلة خير بنات قمرات كتير قلت يابت طنشى جايز تعبانين والا حاجة هو المرض بيميز بين بنت وولد ابص حواليا الاقى المكياج زيادة هو فى حفلة فى العيادة وانا ماعرفش وعيد ميلاد اياد لسة بدرى علية وعيد ميلادى كمان اسبوع وكمان كمية البرفانات الموجودة غطت على ريحة البنج اللى بيخنقنى اصل كل يوم لازم اتخانق معاة بسبب ريحة البنج بيرجع وهدومة مليانة بنج وقالبلنا البيت مستشفى يا بنى ارحمنا مفيش فايدة المهم قلت اما اشوف الحكاية قعدت اسمع كلام الموجودين وسمعت اسمى من وسط الكلام لقيت واحدة بتقول هو مالوش غير اخت واحدة اسمها اروى اصغر منة بسنة مخطوبة قريب و بكرة تتزحلق من البيت ويبقى هو اللى فية هو وعروستة انا ما اعرفش الناس دى عايزين يزحلقونى لية ركزت فى الكلام تانى لقيت الكلام علينا دول بيتكلموا عنى وعن ماما وبابا وعن اياد وبيتكلموا عن شقة اياد اللى لسة هاتتشطب طب هما عرفوا منين دى ماما لسة كانت بتتكلم امبارح مع بابا عن تشطيبات الشقة هى اخبارنا بتتسرب للدرجة دى لقيت الموضوع كبير طلبت اصحابى وقلتلهم هاتاخر عليكوا شوية انا قاعدة هنا لحد ما اعرف فى اية وطلبت ماما وقلتلها انا عند اياد فى العيادة واحتمال اروح معاة علشان ماتقلقش عارفين الامهات . قلت انا هاتعرف على الناس اللى قعدين لقيت بنات فى سنى قلت اما اقعد معاهم والكلام اكيد هيجيب بعضة واشوف اللى فى دماغى صح والا اية الموضوع انا حاسة ان فى إن فى الموضوع عملت فيها عبيطة وباسالهم عن اياد الكل بص على ايدى ونظرة ارتياح بانت على الوشوش اول ما شافوا الدبلة فى ايدى مفيش منى خطر الظاهر مش منافس جديد قالولى القمر اللى جوة دا دكتور زى العسل امور ولذيذ وشاطر انا تنحت اخويا بيتعاكس قدامى وبعد شوية يمكن يطلبوا ايدة منى لو عرفوا انى اختة وماقلكوش على كريزة الضحك اللى جاتلى واللى كتمتها بالقوة اصل عارفة لو ضحكت اية اللى ها يحصل هو الدكتور شاطر الحق يتقال مش علشان اخويا الكل شكر فية بس مش لدرجة الوصف اللى بيوصفوة المهم قمت اشوف سميحة الممرضة واشوف الحكاية دى بقالها كتيير بقولها اية حنفية البنات اللى ضربت فى العيادة هو دة كل يوم والا النهاردة بس قالتلى مش عايزين تفرحوا بالدكتور قريب قولتلها ان شاء الله هو عندك عروسة لة اصل العرايس كتيير اليومين دوول اياد كان خلص الكشف ودخلتلة وياريتنى ما دخلت بعد دة كلة مارضاش يدينى فلوس قال الاخوات لبعضيهم وخرجت من عندة بعد ما قلبنى
وانا خارجة قابلت بنوتة بتسالنى هو الدكتور دة تخصص اية ؟

رشا خطاب
15/02/2008