عريس المحروسة (3)

        جماعة عم محمد واولادة كانوا نازلين دلع فى ولاد المحروسة وكل يوم والتانى طالعين شايلين ومحملين اكياس وكراتين من كل الخيرات واى حد يشوفوه من ولادها يبقوا عايزين يشيلوه من الارض شيل وبيعرضوا خدماتهم يومياً

فى بيت المحروسة اتجمعوا اولادها عشان يحددوا مين هو العريس اللى يستاهل المحروسة الغالية عليهم واتفقوا انهم طالما مختلفين  كل واحد يكتب اختيارة  واللى يجمع أكبر عدد من الاصوات هو اللى هايكون عريس المحروسة

فى بيت عم محمد جماعتة قالتلة انت لازم تتجوز المحروسة أنا خطبتهالك  وهى بتشاور ولادها عم محمد كان جواة مبسوط من الجوازة دى برضة المحروسة اللى الكل بيجرى وراها بس مكنش مبين عشان الجماعة  وكان بيقول الحمل هايبقى تقيل وانة ما يقدرش يستغنى عن الجماعة وانها كل حياتة ودنيتة  جماعتة قالتلة ومين قال انك هتستغنى عنى الوضع زى ماهو وأنا الأساس  دى جوازة مصلحة لما تخلص هنخلص من المحروسة واولادها المسألة مسألة وقت مش اكتر

فى بيت المحروسة طلعت نتيجة التصويت لصالح عم محمد بفرق صوت واحد عملوا كتب كتاب وفرح ع الضيق وعم محمد وجماعتة واولادة  عملوا فرح كبير هما وحبايبهم واخواتهم  والفرحة كانت كبيرة عم محمد فتح شقتة على شقة المحروسة وفتح صدرة على الحياة الجديدة

فى البداية عم محمد كانت معاملتة حلوة لاولاد المحروسة والمحروسة كانت مبسوطة لكن دوام الحال من المحال الوضع ما استمرش كتير لان ولاد عم محمد برطعوا فى البيت وفى كل مكان يخص المحروسة واولادها ونسوا ان فى ناس تانية عايشة معاهم  استولوا على كل حاجة اى حاجة تقع فى ايديهم تبقى بتاعتهم وعايزين يبعوها  وياريت على كدةوبس

كل يوم تلاقى المحروسة حد من ولادها مضروب اومتصاب وكل ماتيجى تشتكى تلاقى الرد جاهز وهما هايضربوهم لية  دة هما اللى ضربوهم وبعد كدة الموضوع اتطور بلطجية يطلعوا على ولادها يضربوهم ويقلبوهم وتيجى المحروسة تشتكى يقولها شوفى مين اللى مأجرهم تلاقيهم بلطجية  طليقك اللى مأجرهم.

لحد مافى يوم ماتنسهوش المحروسة محمد ابنها ونور عنيها خرج وما رجعش طلبتة عشان تتطمن علية زى ماهى متعودة موبيله  كان مغلق حاولت تطلبة اكتر من مرة والنتيجة واحدة مغلق بدأت تقلق لما التأخير زاد وقلب الام بدأ يتوغوش هى مش متعودة انة يتاخر برة البيت ولو حصل بيقولها انه هيتاخر عشان متقلقش. وكمان لما كلمت اصحابة ماحدش يعرف عنة حاجة . قالت لعم محمد وياريتها ما قالتلة لانة قالها انتى اصلاً ماعرفتيش تربى ولادك تلاقية صايع فى اى حتة مع اى شلة فلتانة مش زى اولادى جماعتى مربيهم كويس  ومطعيين وبيسمعوا الكلام وعمر ماحد منهم ما بيتاخر برة البيت من غير ما يستئذن. قالتلة أنا ولادى متربين أحسن تربية وعمر ما حد منهم أتأخر الا لما بيطمنى بالتليفون او يقولى قبلها أنة هيتأخر أنا قلقانة علية جداً لإن موبيلة مقفول وكلمت اصحابة ماحدش شافة حتى مايلة فى الشغل بيقولوا أنة مجاش النهاردة أكيد حصل لة حاجة لازم نبلغ البوليس.

يتبع

رشا خطاب

عيد أضحى مبارك

كل عام وانتم بخير عيد اضحي مبارك

أعاده الله علينا وعليكم بالخير واليمن والبركات

 ويارب إحفظ مصر من كل سوء