الثلاثاء، 31 ديسمبر 2013
حدوتة 2013
كان يا ما كان يا سادة يا كرام وما يحلى الكلام الا بذكر النبى علية الصلاة والسلام . كان فى زمان مش من بعيد من 12 شهر 52 أسبوع 365 يوم ومكان قريب مش بعيد بلد محروسة تاريخها عريق عاشت حكايات كتير وكل يوم كان ليها حكاية والبداية كانت حزينه من جبنه نستو يا معفنين ومعركة الاتحادية وتعرية وسحل مواطن لبلاك بلوك وما حدش عارف مين دول والا جم منين والا راحوا فين الكهربا مقطوعه وضلمة يا مصر وازمة بنزين ناس تقول تمرد يطلعوا عليهم بتجرد ،والناس اتفرقت ناس تنزل ميدان التحرير وناس تروح إشارة رابعة وناس تطلع بالميدان الثالث ، ومش كفاية علينا زحمة وطول الطوابير من طابور العيش لطابور الانابيب طلعولنا بالطابور الخامس واحجز مكانك يا مواطن واللى يقول الشرعية ونسوا ان الشريعة للميدان ،نازل والا متنازل ، ثورة شعبية والا انقلاب كل يغنى على ميدانة ( تحرير، رابعة ) ولما كل الميادين والشوارع تقول تمرد ارحل يبقى الكلمة للميادين والشعب قال كلمتة ايام مرت وكان التفويض .وفى رمضان ولاول مرة المسلمين والمسيحين يصوموا يفطروا مع بعض هى دى مصر اللى كانت بتبعد عننا ورجعت تانى . لما تلاقى المخطوفين ذهنيين فى مولد رابعة وتسمع "اخلع نعليك انك بوادى رابعة المقدسة" .اللى يقول العيد جة قبل رمضان واللى يقول العيد مجاش السنة دى. فض رابعة والنهضة وترسانة اسلحة دم فى كل مكان مين مات ومين هرب ونيولوك لكل جبان حرض وهرب وساب غيره يموت . كنا ايد واحدة شالوا منها صباع وقالو رابعة آه يا بلد وجعانا ووجعنها .
وتوتة توتة خلصت الحدوتة
الثلاثاء، 24 ديسمبر 2013
ليلة لم تنم فيها المنصورة
شق الهدوء صوت دوى انفجار ضخم على كافة ارجاء مدينة المنصورة فى الساعات الاولى من يوم الثلاثاء الكل يبحث عن مكان الصادرعنة الانفجار فصوت الانفجار يبدو قريب جدا من كل الاماكن اصوات سيارات الاسعاف والمطافى تتجة نحو مبنى مديرية الامن .
انفجار فى مبنى مديرية أمن الدقهلية وانهيار جزء من المبنى قتلى ومصابين كثر انهيار مبنى مسرح المنصورة القومى الأثرى ومبنى البلدية واثار الدمار فى شارع العباسى وش بورسعيد والمبانى المجاورة
عشاء اسرة تناثر على الطريق ومصير صاحبة مجهول
مسرح المنصورة القومى
انهيار مبنى مسرح المنصورة القومى
اثار التدمير على مسجد الصالح أيوب
خسائر متعددة لاصحاب المحال والمبانى المجاورة لمبنى المديرية
الخسائر لحقت العديد من المبانى البعيدة عن مديرية الامن من شدة الانفجار
الخسائر البشرية 15 شهيد وأكثر من 130 مصاب فى مستشفيات المنصورة العام والدولى والطوارئ وطلخا
الصور ل : حسام ربيع و أحمد الشبراوى وأخرون
رشا خطاب
الاشتراك في:
الرسائل (Atom)