لامؤاخذة w.c

        قالوا عنة زمان بيت الادب ،الكنيف وبيت الراحة لان الناس بتدخله عشان ترتاح لكن ممكن كمان تدخله عشان تتعذب من قلة النظافة وممكن تطلع مصاب بامراض معدية عديدة   . ولا داعى للاستغراب اذا وجدت  يافطة كبيرة مكتوب عليها النظافة من الايمان والمكان غير نظيف او يافطة قطرة مياة تساوى حياة والحنفيات فى الداخل كلها بايظه .

فى اماكن كتير مش محتاج تسأل لو سمحت التواليت فين ؟ .......... فقط اتبع انفك .

تقدر تحكم على المكان من نظافة الحمام

* لو فى مطعم قبل ما تاكل  وانت بتغسل ايديك شوف نظافة الحمام لان الحمام مراية للمطبخ اللي هتاكل منه بعد شوية لو بيهتموا بالنظافة اكيد هينعكس على نظافة المكان كلة وهتاكل وانت مطمن .

اما لو لقيتة مش نظيف اخرج من الباب اللي جيت منة  الاذا كان نفسك حلوة وناوى تكمل بعد اللي شوفتة .

* قبل ما تقدم لاولادك فى اي مدرسة يا ريت تزور المدرسة وتحاول تشوف الحمامات اللي اولادك هايستخدموها بعدين

لان المدرسة زى ما المفروض تهتم بالتعليم المفروض تهتم بالنضافة والا النتيجة هتبقى معروفة.

 * لو دخلت مصلحة حكومية لانهاء اي مصلحة جرب تدخل الحمام افتكر مشهد عادل امام فى فيلم الارهاب والكباب وهو بيدور على الموظف عشان يخلص له الاوراق المشهد تجسيد حقيقي  لصورة دورات المياة فى بلدنا .

* لو مسافر اى محافظة مش محتاج تسأل عشان تعرف طريق دورات المياة فى المواقف ده اذا كانت موجودة اصلاً .

الاهتمام بالنظافة  يعكس مستوى تطور البلد ووعى السكان وثقافة المجتمع

الصين من فترة  قررت تعمل أكبر ثورة في تاريخها................

الثورة لتطوير دورات المياه" العامة عشان الحياة أفضل . واحنا عندنا لو دخلت دورات المياة العامة ولقيت الحنفية موجودة بوس ايدك وش وظهر واحمد ربنا على النعمة اللي انت فيها .

رشا خطاب

28/9/2013