يا عالم ياهوة

يا عالم ياهوة
انتوا ناويين تجننونى
اعمل اية
اقطع نفسى
معلش ياعم فطوطة
انت اللى عودتنا عليها من صغرنا
"اقطع نفسى ابهدل نفسى "
اولع فى نفسى علشان ترتاحوا
اجيب فلوس منين
مصاريف المدارس
والا الزى بتاعهم
والكشاكيل والاقلام والشنط
وفلوس الدروس الخصوصية
وكمان رمضان على الابواب
كل سنة وانت طيب
واعمل حسابى على هدوم العيد
وفلوس الكحك والبسكوت والذى منة
ماهو شهر بيعدى هوا
وكلة فى وقت واحد
اسرق والا انصب علشان اجيب كل الحاجات دى
يعنى المدارس ماكنش ينفع تتاجل
هما يعنى من فلاحة العيال
والا خلاص مقطعين الكتب مذاكرة
ماهم هيقعدوا قدام التلفزيون طول النهار
وهيقولولك ما بنعرفش نذاكر واحنا صايمين
وبعد الفطار
مسلسل بيجر مسلسل والا حد هيذاكر
ويروحوا المدرسة عايزين يناموا
يعنى اية الفايدة
هو شهر اللى هيفرق
ماهم ما بيذكروش الا ليلة الامتحان دا ان ذاكروا
وكل ما تشوفونى
عايزين فلوس عايزين فلوس
هو انا قاعد على بنك
مفيش فلوس
مفيش يا ميش
وهاحجزلكوا من بدرى فى موائد الرحمن
اصل السنة دى بالحجز
الحق اقف فى الطابور
سلام