جماعة عم محمد حست بالخطر الوقت كان قليل وهى كانت بانية خططها ومرتبة وضعها على اخوها التغيير لعم محمد كان صعب لان فرصة مش كبيرة زى باقى العرسان فقررت هى واولاادها انهم ينزلوا بنفسهم ويجمعوا معلومات تفصيلية عن كل العرسان ويلفوا حواليهم ويعرفوا كل حاجة عنهم من البواب والمكوجى و بتاع العيش والخدامة والسوبر ماركت هما بيشتروا منة اية ويسئلوا عن اصحابهم و اعدائهم ومتشكلين مع مين معلومات تفصيلية ودقيقة جدا وكل اللى كانوا يعرفوة ينقلوة بطريقتهم لجيران واصحاب المحروسة بعد ما يضيفوا شوية تحابيش تفركش اى جوازة وتدخل الشك فى الموضوع ويأكدوا على اللى بيقولوة ان الموضوع سر والا كانى قلتلك حاجة احنا مالناش دعوة والمهم انهم يكونوا بعاد عن الصورة.وطبعا السر مش بيكون فى بير والكلام كان بيوصل للمحروسة اللى بيوصل الكلام كان بيزود شوية تحابيش كمان من عندة
وفضل الوضع على دة الحال لحد ماتبقاش غير عريس واحد وجماعة عم محمد كانت شايفاة انها تقدر تطفشة بسهولة .
فراحت للمحروسة ونزلت عليها بالقنبلة وعرضت عليها انها تتجوز سى الاستاذ محمد المحروسة اتخضت من العرض لكن جماعة عم محمد قالتلها احنا ستات زى بعض وانتى اتظلمتى كتير واحنا شفنا ظلم كتير وعيشنا زيك فى الظلم وعمر اللى اتظلم ما هيظلم سى الاستاذ محمد راجل طيب وشوفى هو بيعاملنا ازاى وهيراعى ربنا فيكى وفى اولادك وولادك هيكونوا اخوات لاولادى وانا اللى بقولك وبخطبهولك خدى وقتك وفكرى وردى عليا . بس خدى بالك كلام الناس كتر والناس ما بترحمش وبدأوا يتكلموا عليكى ويقولوا من بعد ماخلعت جوزها وهى عاملة مزاد على العرسان ومستحلية الموضوع
المحروسة بعد تفكير قعدت مع ولادها وقالتهم الوقتى الموضوع طول وانا جمعتكوا النهاردة عشان تقرروا تختار بين الاستاذ محمد والعريس التانى فشوية من ولادها قالوها الاتنين ما ينفعوش لا عم محمد ينفع والا العريس التانى ينفع عم محمد لابيهش والا بينش وجماعتة هى اللى ممشياة الكلمة كلمتها والشورة شورتها والعريس التانى زى جوزك الاولانى يبقى عملتى اية هنرجع للقرف والهم تانى وكانك يا بو زيد ماغزيت . شوية تانيين من ولادها قالولها العريس التانى قوى ولة هيبة هو اللى يقدر يحافظ عليكى وهو شاف انك خلعتى جوزك الاولانى واكيد هيحط دة فى حساباتة .
وشوية من ولاها قالولها عم محمد هو المناسب راجل طيب وابن حلال وشوفى بيعامل جماعتة ازاى ودة لو معجبكيش سهل تخلعية واخر مجموعة من ولادها قالولها اللى تشوفية يا ماما احنا مالناش قول بعد قولك اللى هتوافقى علية احنا موافقين علية المحروسة احتارت تختار مين وفكرت انها نعمل قرعة واللى هايطلع هيكون هو العريس
يتبع
16- مارس 2013
رشا خطاب
ليست هناك تعليقات:
إرسال تعليق