يوم الجمعة
يوم الجمعة زمان
البيت كلة بيصحى بدرى يفطروا مع بعض ويتجمعوا على ترابيزة واحدة
فطار مصرى أصيل طعمية سخنة وفول وبيض وجبنة وعسل وعيش بلدى
ويا سلام لو جايلك زيارة من البلد عيش فلاحى وكماج جبنه قريش ومش
كوباية شاى أصيلة فى كوباية مش مج فنجان قهوة على سبرتاية بوش
تفتح التلفزيون تتفرج على سينما الأطفال ومغامرات الكلبة لاسى
ثلاث جرايد موجودة الاهرام والأخبار والجمهورية مجلة علاء الدين من اليوم اللى قبلة عشان تتقرأ يوم الجمعة.
تسمع خطبة الجمعة من الجامع اللى جمبك او تتفرج وتسمعها ف التلفزيون
وحملة نظافة فى كل البيوت وريحة البخور فى كل مكان تسمع القرآن فى كل البيوت
سورة الكهف تتقرأ ودعوة حلوة من ست الحبايب بعد كل صلاة يمكن تكون ساعة استجابة.
تتفرج على عالم الحيوان وتستنى سر الأرض وتضحك مع القرموطى
الكل مستنى الساعة 2 حديث الشعراوى باسلوبة السلس
مع النجوم “ميكى ماوس” عبد الله احمد عبدالله ذكريات مع النجوم
الفيلم العربى اللى بنستناة من الجمعة للجمعة فيلم قديم ومتكرر بس الكل بيحبة وبيتفرج علية.
برنامج حياتى يحول المشاكل الاجتماعية لعمل درامى جميل ويحلها
اللعب والاتارى اللى بيطعوا يوم الجمعة مفيش مذاكرة فية لعب النهاردة اجازة
خروجة وفسحة حلوة بنحلم بيها طول الاسبوع موعدين بيها يوم الجمعة عشان سمعنا الكلام.
العيلة كلها تتجمع فى بيت العيلة لعب وضحك وهزار والامهات كلها ف المطبخ بتجهز احلى غدا
الكل يتجمع الساعة 7 مستنين المسلسل العربى الحلقة مالهاش اعادة بعد ساعتين والا هانشوفها ع اليوتيوب.
حديث الروح قبل نشرة تسعة واخبار الاسبوع كلها متجمعة فى نهاية الاسبوع
مستنين فيلم السهرة اللى بيخلص بدرى اصل التلفزيون بيقفل وبيعمل
وشششششششششششششششششششششششششششش
رشا خطاب
ليست هناك تعليقات:
إرسال تعليق